• Policlínica Gipuzkoaren Osasun Aulako edizio berri honetan, aurpegi‑masaileko kirurgian, otorrinolaringologian eta kirurgia plastikoan adituak diren medikuek azalduko dute nola diagnostiko-teknika berriek eta 3D ingeniaritzak funtsezko euskarri gisa jarduten duten gaur egungo aurpegi‑masaileko kirurgien diseinuan, prestakuntzan eta garapenean.
• Osasun Aula astelehen honetan, apirilaren 27an, 19:00etan izango da, Anoetako Estadioaren Prentsa Aretoan (0 atea). Sarrera librea izango da edukiera bete arte, eta Policlínica Gipuzkoaren YouTube kanalaren bidez ere jarraitu ahal izango da.

Aho‑aurpegiko patologiak oso ohikoak dira, eta zuzenean eragiten diote horiek pairatzen dituzten pertsonen bizi‑kalitateari. Gaitz horiei buruz argibide gehiago emateko asmoz, Policlínica Gipuzkoak Osasun Aularen edizio berri bat antolatuko du datorren astelehenean, apirilaren 27an, “Aho‑aurpegiko osasuna 360º” izenburupean. Bertan, hiru espezialistak kasu kliniko ezberdinak aurkeztuko dituzte, baita 3D ingeniaritzak masailezurreko kirurgiei zehaztasun eta segurtasun handiagoa emateko eskaintzen dituen kirurgia‑teknika berriak ere. Gainera, lo‑apneari, arnasketa‑funtzio egokiari eta aurpegi‑estetikaren oreka lortzearen garrantziari lotutako gaiak ere jorratuko dira.

Hitzaldia apirilaren 27an, astelehenean, izango da, 19:00etan, Anoetako Estadioko Prentsa Aretoan. Sarrera librea izango da edukiera bete arte. Horrez gain, saioa zuzenean jarraitu ahal izango da Policlínica Gipuzkoaren YouTube kanalaren bidez.

Artikulazio tenporomandibularraren (ATM) nahasmenduek prebalentzia handia dute gure gizartean. Arazo horiek masailezurretako mina, artikulazio‑soinuak, ahoa irekitzeko mugak eta eguneroko jarduerak —hala nola murtxikatzea, hitz egitea edo aharrausi egitea— zailtzea eragin dezakete. “Kasu askotan, eragin funtzional eta emozionala nabarmena da”, azaldu du Javier Martín Policlínica Gipuzkoako aurpegi‑masaileko kirurgiako zerbitzuburuak.

Horri gehitzen zaio loaren apnea oztopatzailea, adituen arabera benetako “epidemia isila” dena. Kalkuluen arabera, Estatuko bi milioi pertsonak jasan dezakete diagnostikatu gabe, eta 600.000 paziente baino gehiago daude dagoeneko tratamenduan, urteko %8 eta %10 arteko hazkundearekin. “Apneak arnasketa‑etenak eragiten ditu lotan, egunezko logura, arazo kardiobaskularrak, eta atsedenaren eta eguneroko errendimenduaren narriadura handia”, adierazi du Carlos Saga otorrinolaringologoak.

ATMren nahasmenduak eta lo‑apnea estuki lotuta daude hortzetako arazoekin, masailezur‑disfuntzioarekin, buru‑lepoetako minekin eta ongizate orokorrean eragiten duten aldaketa estetikoekin.

Osasun Aulan, patologia horien kirurgian izandako aurrerapen teknologikoak ere azalduko dira. “Aho‑, aurpegi‑masaileko eta aurpegiko kirurgiak jauzi kualitatiboa egin du plangintza tridimentsionala (3D), ordenagailuz lagundutako kirurgia, 3D inprimatutako gida kirurgikoak, teknika gutxiago inbaditzaileak eta azken belaunaldiko laser‑teknologia txertatu direlako”, azaldu du Javier Martín aurpegi‑masaileko zirujauak.

“Berrikuntza horiei esker, esku‑hartzeak zehatzagoak, azkarragoak eta traumatismo gutxiagokoak dira, konplikazioak murriztuz eta errekuperazio‑denborak laburtuz”, gaineratu du.

Aurpegi‑estetikaren arloan, José Manuel Santos kirurgialari plastikoak gorantz doazen teknikak aurkeztuko ditu, hala nola errinoplastia ultrasonikoa, lifting pertsonalizatuak eta piezotomoen erabilera. Tresna horiek hantura murrizten dute, eta emaitza naturalagoak, harmoniatsuagoak eta pazientearen aurpegira hobeto egokitutakoak lortzen laguntzen dute.

Osasun Aulak bertaratutakoei aukera emango die patologia horiek nola diagnostikatzen eta tratatzen diren azaltzeko, zein sintomari erreparatu behar zaien eta gaur egun eskuragarri dauden irtenbide aurreratuenak zein diren ezagutzeko.

Medikuen azalpenen ondoren, bertaratutakoek zein online bidez jarraitzen dutenek galderak egiteko aukera izango dute, solasaldi ireki batean.