• Minbizia gainditu duten Milena Amelibia eta Irantzu Pinillosek Policlínica Gipuzkoan egin dituzte 2026ko Reto Pelayo Vida Senegal espedizioan parte hartu aurreko osasun-probak.
• Espedizioko kideetako batek, Milena Amelibiak, “Minbizia eta kirola: ariketa fisikoa gaixotasunaren bidelagun gisa” hitzaldian ere parte hartuko du, Pazientearen Esperientziaren I. Astearen barruan.
• Hitzaldia urriaren 22an izango da, 15:00etan, Policlínica Gipuzkoako Areto Nagusian, eta minbizian zehar eta ondoren ariketa fisikoak duen garrantzia izango du hizpide.

Policlínica Gipuzkoak 2026ko Reto Pelayo Vida Senegal ekimenaren hurrengo edizioan parte hartuko duten bost emakumeetako biri egin die osasun-azterketa: Milena Amelibia eta Irantzu Pinillos. Minbizia gainditu duten emakumeak biltzen dituen espedizio honek kirol- eta giza-erronka bat du helburu, eta Senegalen barrena ia 600 kilometroko ibilbidea egingo du, bizikleta, kayaka eta tokiko komunitateekin elkarbizitza uztartuz.

Azterketa mediko horiek Quirónsalud taldeak ekimenaren osasun-hornitzaile ofizial gisa duen lankidetzaren barruan egin dira. Lan horren bidez, espediziokideen osasun-egoera eta prestaketa fisikoa baloratzen dira erronkari ekin aurretik. Ekimenaren helburua da minbizia gainditu ondoren ere posible dela erronka pertsonal eta kirol-helburu handiei eusten jarraitzea erakustea.

Irantzu Pinillosen hitzetan, espedizio honetan parte hartzea «gaixotasunak iraun duen bitartean egindako bide guztiaren sari bat da».

«Minbiziak bizitza aldatu egiten dizu eta oso une zailak bizitzera eramaten zaitu. Orain Reto Pelayo bezalako proiektu batean parte hartu ahal izatea gainditu dugun guztia ospatzeko modu bat da, eta inoiz baino indartsuago jarraitzen dugula erakusteko aukera», azpimarratu du.

Erronkaren prestaketaren barruan, bi espediziokideek Policlínica Gipuzkoan egin dituzte beharrezko azterketa medikoak, osasun-egoera baloratzeko eta abenturari baldintzarik onenetan aurre egingo diotela bermatzeko.

Milena Amelibiarentzat, edizio honetan parte hartzea «minbiziak ez dituela ametsak eta erronka pertsonalak amaitzen erakusteko aukera» da.

«Diagnostikoa jasotzen duzunean, ate asko betiko ixten direla pentsatzen duzu. Reto Pelayok kontrakoa erakusten du: helburu berriak ezartzen jarrai dezakegula, kirolaz gozatu eta inoiz imajinatuko ez genituzkeen erronkei aurre egin diezaiokegula», adierazi du.

Itxaropen eta gainditze mezua

Hain zuzen ere, Milena Amelibiak itxaropen eta gainditze mezu hori partekatuko du datorren urriaren 22an, 15:00etan,“Minbizia eta kirola: ariketa fisikoa gaixotasunaren bidelagun gisa” izeneko hitzaldian. Jarduera hori Policlínica Gipuzkoak antolatutako Pazientearen Esperientziaren I. Astearen ekimen nabarmenetako bat da.

Hitzaldian, Milena Amelibiak bere esperientzia pertsonala kontatuko du, eta azalduko du nola lagundu zion jarduera fisikoak tratamendu onkologikoan eta ondorengo errekuperazioan.

«Ariketa fisikoak indar fisikoa berreskuratzen lagundu zidan, baina baita konfiantza eta ongizate emozionala ere. Gustatuko litzaidake gaixotasuna bizitzen ari diren beste pertsona batzuek ere jakitea egoera bakoitzera egokituta aktibo mantentzeak zer onura ekar ditzakeen», adierazi du Errenteriako erizainak, 2026ko Reto Pelayoan parte hartuko duenak.

Policlínica Gipuzkoako Pazientearen Esperientziako arduradun Verónica Cañibanok nabarmendu du Milena Amelibiaren presentziak balio berezia ematen diola ekimenari.

«Pazienteek profesionalen eskutik informazio zorrotza jasotzea nahi dugu, baina baita inspiratzen eta laguntzen duten benetako testigantzak ere. Milenaren esperientzia adibide bikaina da ariketa fisikoa minbizian zehar eta ondoren aliatu handi bihur daitekeela erakusteko».

Izen-ematea zabalik

“Minbizia eta kirola: ariketa fisikoa gaixotasunaren bidelagun gisa” hitzaldia Pazientearen Esperientziaren I. Asteko doako jardueren programaren parte da. Astea urriaren 19tik 23ra egingo da Policlínica Gipuzkoan. Interesdunek zentroaren webgunean kontsulta dezakete egitarau osoa eta bertan eman dezakete izena.

«Minbiziaren ondoren bizitza badago, proiektuak badaude eta erronka berriak ere bai. Milenaren moduko istorioek gizarteari helarazi nahi diogun itxaropen mezua indartzen dute», ondorioztatu du Verónica Cañibanok.