• Autotxerto bakterianoekin tratatutako pazienteen %75era arte mikrobio berak eragindako infekzioen ziklo errepikakorra haustea lortzen dute.
• Alejandro González urologoak azpimarratu du terapia horiei esker antibiotikoen erabilera luzea eta horiei lotutako albo-ondorioak murriztu daitezkeela.
• Estrategia pertsonalizatu berriek, maskuriko instilazioekin batera, itxaropena eskaintzen diete gernu-infekio errepikapenekoak eta ezgaitzaileak jasaten dituzten emakumeei.

Errepikapeneko gernu-infekzioak emakumeen artean ohikoenak diren arazo urologikoetako bat dira, eta eragin handia izan dezakete emakumeen bizi-kalitatean. Gertakariak behin eta berriz errepikatzen direnean, mina, etengabeko eragozpenak eta antibiotikoekin etengabeko tratamenduak sortuz, inpaktu fisikoa eta emozionala handia izan daiteke. Hala ere, azken urteetako aurrerapen terapeutikoei esker, irtenbide berriak eskaintzen ari zaizkie paziente horiei. Horien artean, autotxerto bakterianoak nabarmentzen dira. Tratamendu berritzailea dira, eta organismoak errepikapeneko infekzioak eragiten dituzten bakterioen aurrean dituen defentsak indartzea du helburu.

Hala azaldu du Alejandro González doktoreak, Gipuzkoako Poliklinikako urologoak. Gogorarazi du errepikapeeko gernu-infekzioa, sei hilabeteko aldian hiru gertakari edo gehiago gertatzen direnean kontsideratzen dela. Edozein pertsonari eragin diezaioketen arren, kasu gehienak emakumeetan erregistratzen dira.

Espezialistaren arabera, infekzio horien atzean aurretiko faktore ugari egon daitezke. Emakume gazteengan eragina dute familia-aurrekariek, txiki-txikitatik infekzioak izan izanak edo sexu-jarduerarekin lotutako zenbait faktorek. Menopausia osteko emakumeetan, aldaketa hormonalek, inkontinentziak edo maskuriaren hustuketa osatugabeak ere eragin dezakete.

Bakterio erantzulea identifikatzearen garrantzia

Urologoak gehien azpimarratzen duen mezuetako bat da urokultiboa beti egiteko beharra, gernu-infekzio batekin bateragarriak diren sintomak agertzen direnean, hala nola txiza egitean erredura, mikzio-maiztasuna handitzea edo komunera joateko kiiretasuna. Analisi horri esker, zehatz-mehatz identifika daiteke zein bakterio eragiten ari den infekzioa, eta tratamendu egokiena bideratu.

Escherichia coli bakterioak errepikapeneko gernu-infekzioen %60a inguru eragiten ditu, baina beste mikroorganismo batzuek ere esku har dezakete, hala nola Klebsiella pneumoniae, Enterococcus faecalis edo Proteus.

Tratamendu konplexuagoak planteatu aurretik, espezialistek prebentzio-neurriak gomendatzen dituzte, hala nola likido gehiago hartzea, higiene intimoa egokia izatea, sexu-harremanen ondoren pixa egitea edo zenbait probiotiko, D-manosa edo ahabiak bezalako gehigarriak erabiltzea, paziente batzuen errepikapenak murrizten lagun dezaketenak.

Antibiotikoekiko menpekotasuna murrizteko erronka

Neurri horiek nahikoak ez direnean, ohiko abordatzea antibiotikoen jarraibide luzeak izan dira. Hala ere, emakume askok errezeloak dituzte tratamendu horiekin jarraitzeko, digestio-efektuak, candidiasia edo hilabeteetan antibiotikoak hartzeak eragindako nekea direla eta.

Hain zuzen ere, egoera horretan sortzen dira arazoaren kausan eragin nahi duten alternatiba terapeutiko berriak, eta ez soilik haren sintometan.

Autotxerto bakterianoak: emaitza esperantzagarriak dituen terapia pertsonalizatua

Berrikuntza garrantzitsuenen artean, aipatzekoa da autotxerto bakterianoa, medikuntza pertsonalizatuko estrategia bat, mikroorganismoak berak behin eta berriz eragindako infekzio errepikariak dituzten pazienteei zuzendua.

Prozedura pazientearen gernu-lagin bat jasotzean hasten da. Identifikatutako bakterioetatik abiatuta, laborategi espezializatu batek txerto indibidualizatu bat egiten du. Mikroorganismoak inaktibatu eta esekidura bihurtzen dira. Esekidura hori egunero ematen da, mihipeko lainoztatzeen bidez, organismoaren erantzun immunitarioa estimulatzeko.

Orain arteko emaitzak bereziki pozgarriak dira. González doktoreak azaldu duenez, tratatutako pazienteen %75 inguruk infekzio errepikatuen zirkulua apurtzea lortzen dute, eta bakterio berak eragindako gertakari berrietatik libre egoten dira sei hilabete eta urtebete bitarteko aldietan.

Jarraipen luzeagoak dituzten azterlanak falta badira ere, espezialistak uste du interes kliniko handiko tresna dela. Gainera, beste txerto batzuekin gertatzen den bezala, etorkizunean dosi berriak ematea baloratu ahal izango litzateke, lortutako babesa pixkanaka galtzen dela ikusiz gero.

Aukera gehiago errepikapeneko infekzioak dituzten pazienteentzat

Gertakari bakoitzean bakterio desberdinek eragindako infekzioak dituzten emakumeentzat, autobakuna ez da beti aukerarik onena izaten. Kasu horietan, espezialistek maskuriko instilazioetara jo dezakete. Tratamendu hori ospitalekoa da, eta maskurian azido hialuronikoa eta kondroitin sulfatoa bezalako substantziak sartzean datza, infekzioetatik babesteko hesi naturala indartzeko.

Urologoaren arabera, terapia horiek ere emaitza oso positiboak lortzen ari dira, eta paziente askok infekzio-kopurua izugarri murriztea eta zenbait hilabetez gertakari berririk gabe egotea ahalbidetzen dute.

Itxaropen-mezu bat

Amaitzeko, Alejandro González doktoreak baikortasun-mezua helarazi die errepikapenekoo gernu-infekzioekin bizi direnei. “Urtean sei infekzio izatetik infekzio bat edo bat ere ez izatera igarotzeak sekulako aldaketa dakar paziente horien bizi-kalitatean”. Horregatik, behin eta berriz gertatzen diren gertakarien aurrean espezialistari galdetzera animatu du, eta gogorarazi du gaur egun tratamendu berritzaileak daudela, emakume askoren bizitza baldintzatu duen arazo bati benetako konponbideak eskaintzeko gai direnak.