Policlínica Gipuzkoako ginekologoak, Nabil Manzour doktoreak, emakumeen gernu-inkontinentziaren arrazoi ohikoenak eta eskuragarri dauden tratamenduak azaltzen ditu, %90etik gorako arrakasta-tasa duen kirurgia barne.

Gernu-inkontinentzia, batez ere emakumeei eragiten dien patologia ohikoa da, eta eragin nabarmena izan dezake haien bizi-kalitatean, bai fisikoki bai sozialki. Nabil Manzour, Policlínica Gipuzkoako ginekologoak azaldu duenez, “gernua nahi gabe eta aurreikusi gabe galtzea da. Normalizatu behar ez den egoera da, eta horretarako tratamendu eraginkorrak daude”.

Emakumeen artean gernu-inkontinentziaren prebalentzia handiagoa izatea hainbat faktoreren ondorio da. “Joera anatomikoa dago, emakumeen uretra laburragoa delako eta, ondorioz, presio-aldaketen aurrean ahulagoa da”, adierazi du espezialistak. Horri gehitu behar zaizkio haurdunaldia eta erditzea, zoru pelbikoan lesioak eragin ditzaketenak, baita aldaketa hormonalak ere, bereziki menopausian, estrogenoen beherakadak tonuan eta euste-ehunean eragiten duenean. Obesitatea, idorreria, eztul kronikoa edo ahalegin fisiko jakin batzuk bezalako faktoreek ere patologia hori izateko arriskua handitzen dute.

Gernu-inkontinentzia motak

Manzourrek bi gernu-inkontinentzia mota nagusi eta forma misto bat bereizten ditu. “Esfortzuzko gernu-inkontinentzia da ohikoena, eta gernu-ihesak agertzen dira eztulka, barre eginda, salto eginda edo edozein ahalegin egiterakoan”, azaldu du. Bestalde, urgentziazko gernu-inkontinentziak “bat-bateko eta oso intentsua den pixa egiteko beharra du ezaugarri, eutsiezina, normalean maskuriko muskuluaren hiperaktibitatearekin lotuta”. Biak batera agertzen direnean, gernu-inkontinentzia mistoaz hitz egiten da.

Inkontinentziaren tratamendua motaren eta pazientearen eguneroko bizitzan duen eraginaren araberakoa da. “Urgentziazko gernu-inkontinentzia batez ere tratamendu medikoarekin tratatzen da; esfortzuzko gernu-inkontinentzian, berriz, tratamendu kontserbadoreekin has gaitezke eta, nahikoak ez badira, kirurgia planteatu”, adierazi du ginekologoak.

Kirurgia bereziki gomendatzen da inkontinentziak pazientearen eguneroko bizitza mugatzen duenean edo aurreko tratamenduek emaitzarik ematen ez dutenean. “Interbentzio nahiko laburra da, 20-30 minutukoa, eta euskarri-zinta edo sare bat jartzean datza, uretra bere kokapen eta funtzio egokira itzultzeko”, azaldu du Policlínica Gipuzkoako ginekologoak.

Arrakasta-tasa handia eta emaitza iraunkorrak

Kirurgia “oso eskertua” da, %90etik gorako arrakasta-tasarekin. “Pazienteek hobekuntza lehen egun edo asteetatik bertatik nabaritzen dute, eta oso pozik egoten dira emaitzarekin”, adierazi du espezialistak. Ebakuntzaren ondoren, lehen sei asteetan ahaleginak saihestea gomendatzen da, baita sabeleko presioa murriztu eta zoru pelbikoa babesten duten ohitura osasungarriak hartzea ere.

Kasu gehienetan, kirurgia behin betikoa da. “Egoera jakin batzuetan sintomatologia berriro ager daitekeen arren, bereziki arrisku-faktoreek jarraitzen badute, ohikoena da interbentzio bakar batekin sintomak kontrolpean geratzea”, gaineratu du.

Emakumeei zuzendutako mezu argia

Nabil Manzourrek mezu argia helarazi nahi die emakumeei: “Gernu-inkontinentzia ohikoa da, baina ez da normala. Ez da ezkutatu behar”. Horregatik, espezialista batengana jotzera animatzen ditu, inkontinentzia mota identifikatu eta tratamendurik egokiena baloratzeko. “Esfortzuzko gernu-inkontinentziak bizi-kalitatea mugatzen badu, kirurgiak normaltasuna berreskuratzeko aukera ematen du. Kirurgia funtzionala da, pazienteari ongizatea itzultzen diona”.

Ildo horretan, nabarmendu du Policlínica Gipuzkoak esperientzia handiko diziplina anitzeko taldea duela, kasu bakoitza modu integralean lantzen duena, tratamendu kontserbadoretik hasi eta ebakuntza osteko jarraipenera arte, paziente bakoitzari ahalik eta irtenbiderik onena eskaintzeko helburuarekin.